Jemi shumë të lumtur të ndajmë me ju projektin tonë të parë që u zhvillua gjatë vikendit të kaluar në qytetin e Vushtrrisë. Ekipi ynë i përkushtuar filloi me shpërndarjen e fletushkave nëpër qytet duke bashkëbiseduar me qytetarët për mirëqenien e kafshëve. Përmbajtja e këtyre fletushkave kishte për qëllim vetëdijësimin e qytetarëve rreth rëndësisë që ka riprodhimi i përgjegjshëm, kastrimi/sterilizimi dhe vaksinimi i kafshëve si dhe parandalimin e braktisjes së qenve. Synimi ynë ishte që secili pronar i qenve në komunitet të kuptojë rëndësinë e këtyre çështjeve.
Gjatë projektit ne u takuam me drejtorin e Drejtorisë për Mbrojtje dhe Shpëtim në Vushtrri z.Maliq Ferizi, menaxherin kontraktues z.Sabri Dallku si dhe me drejtorët nga shoqata e gjahtarëve “Çyçavica”. Këto takime ishin shumë të dobishme ngaqë biseduam për disa nga problemet më të rëndësishme si parandalimin e braktisjes së qenve, shëndetin e kafshëve dhe krijimin e një komuniteti dashamirës dhe të përgjegjshëm.
Gjithashtu patëm rastin të takojmë disa nga fermerët e Vushtrrisë ku diskutuam bashkë iniciativa të ndryshme për mirëqenien e kafshëve nën kujdesin e tyre. Ky projekt kishte sukses të jashtëzakonshëm dhe bashkëpunimi për një qëllim të përbashkët ishte eksperiencë shumë e dobishme. Ne do të ju informojmë për zhvillimin dhe ndikimin e këtij projekti në komunitetin tonë. Na ndiqni.
*Ky projekt është realizuar si bashkëpunim ndërmjet KAPA(Shoqata Kosovare për Mbrojtjen e Kafshëve) me fondacionin zvicërran StrayCoco dhe North Animal Hospital në Vushtrri.
Comments